የተጀመሩ ፕሮጀክቶችን ሳናጠናቅቅ ሌሎች ፕሮጀክቶችን መጀመር የኢኮኖሚ ችግር እያስከተለብን ነው ያሉት ጠቅላይ ሚኒስትር አብይ አህመድ በርካታ ሜጋ ፕሮጀክቶች በብድር ተጀምረው በተያዘላቸው ጊዜ ባለመጠናቀቃቸው ብድሮችን ለመክፈል አዳጋች እንደሆነ አስታውቀዋል።

ከዚህ በኋላ መንግስት ቅድሚያ የሚሰጠው ለተጀመሩ ፕሮጀክቶች መሆኑንና ለነዚህ ልዩ ድጋፍ በማድረግ ካጠናቀቀ በኋላ አገልግሎት ሲሰጡ ብቻ ሌሎች ፕሮጀክቶችን መጀመር ይቻላል ብለዋል፡፡

ጠቅላይ ሚኒስትር ዶክተር አብይ በመንግስት ዓመታዊ ዕቅድ ዙሪያ በህዝብ ተወካዮች ምክር ቤት ተገኝተው በሰጡት ማብራሪያ ላይ እንዳስታወቁት መንግስት የጀመራቸው የልማት ስራዎች አልተቋረጡም።

አዳዲስ ፕሮጀክቶች የዘገዩት የተጀመሩት እስኪጠናቀቁ በሚል ነው ያሉት ጠቅላይ ሚኒስትሩ በዘንድሮ አመት ለመንገድ ግንባታ 38.5 ቢሊዮን ብር ፣ ለኤሌክትሪክ ሃይል ደግሞ 130 ቢሊዮን ብር በጀት መያዙን ተናግረዋል።

የግል ባለሃብቶችን የኢንቨስትመንት ሴክተሮች ላይ በማሳተፍ በርካታ እድሎችን ለመፍጠር እየተሰራ መሆኑንም ጨምረው ተናግረዋል፡፡